小米今日舉行發布會，發布全新的小米電視3，採用60吋原裝LG 4K屏幕，支援播放超高清畫質。最大特色係小米今次玩「分體電視」，將屏幕同主機拆開，靠一條「米線」連接，仲有得單買主機添。
 |  |
小米電視今次玩「分體電視」的概念，雷軍指傳統的智能電視成本裡，屏幕佔70%，主底板則佔20%；屏幕可用10年，但主底板18個月就需要更換。小米電視3就將主底板改為放置到獨立音響上，接口亦移至音響上，只靠一條「米線」連接智能主機同屏幕。
先講屏幕部分。小米電視3採用全金屬機身，薄至11.6mm，並具備178廣視角。內置6M60獨立圖像處理器，並加入「MEMC運動補償」，可減輕影像移動時產生的鬼影。電視同樣運行MIUI TV系統。
 |  |
智能電視主機方面，可以話係電視主底板+獨立音響+小米盒子三合一。獨立音響配置兩個球頂高音揚聲器及4個2.5吋中低音揚聲器，採用DolbyAudio音效技術，新增自動調整音量功能，官方話「高音亮、中音準、低音沉」，發布會現場試音仲播埋蔡琴「是誰～在敲打我窗～」唔通雷軍都鍾意睇《無間道》？講起港產片，今次新電視主機內容上都有升級，增至44億小時，可以睇到更多中外電影，包括《復仇者聯盟2：奧創紀元》、《火星任務》、《衝上雲霄》等等。
 |  |
小米電視3全套售4,999人民幣，附藍牙遙控，11月3日起在官網開售。小米次世代智能電視主機可獨立購買，售999人民幣。雷軍話插返條「米線」，就可以Upgrade閣下屋企部舊智能電視，唔換芒都冇問題，一樣可以睇小米電視。