騙徒手法層出不窮，不過都唔係次次都咁新穎，除咗「猜猜我是誰」電話騙案同祈福黨等等，近日仲有人嘗試重用一招「手機扮八達通嘟聲」。網上流傳一張城巴內部發出的通告，指近日城巴 969 線曾有一名男乘客試圖利用手機發出的「嘟」聲扮八達通響聲，詐詐帝想唔畀錢搭霸王車。
通告中指一名男乘客乘坐 969 在摩頓台登車時，企圖用手機響聲冒充八達通響聲，藉以避繳車費，事件當場被車長識破，男乘客亦即時以現金繳付車費。城巴提醒車長加倍留意乘客有否付足車費，若有人逃票或短付車費就應「禮貌地」要求有關乘客繳付適當車費。
現時 Google Play 上仍可找到八達通嘟聲模擬器應用程式，App Store 則已將較早前的「八達窿」App 下架。
現時手機八達通 SIM 流行，不排除有人一時貪念藉機「舊橋重用」，扮使用手機八達通 SIM 搏大霧搭霸王車。但其實除了八達通機的「嘟」一聲，車長亦可以透過座位旁邊的控制器，得知乘客是否已付足車費，所以都係便宜莫貪啦。
圖片來源：柏斯敦巴士台 Facebook, Wikipedia